Bulador

Kung saan mo ako noon pinahanap

Ang pagkakataong labis na nagpapabalik sa akin sa nakalipas

Bumitaw na ako sa pisi pero di pa rin nakakaalpas

Nililipad ng hanging nagtunaw sa'king kaplastikan

Ipinangangalandakang ako'y isang bulador masaya kunyari sa initan

Hawak mo ako pero ako'y walang pangkapit sa'yo

Pag binuksan mo ang palad, sabay hawi ng buhay ko

Kita ng lahat ang pagbulusok ko sa himpapawid

Nagpasirok-sirok sa mga ulap lumagpak sa pawid

Butas ng mahawakan, di na muling mapalipad

Ang saranggolang sa pangako'y di marunong tumupad

Sa mga panahong pinandidilatan ako ng dilaw na araw

At ang sinag tagos sa aking lamang nangunguhaw

Kailangan ko ng bumaba, ngunit kahit ika'y bumitaw

Makabababa lamang kung ang maghihila ay ikaw

Saranggola sa alam mong kung ano ako

Bulador na tinitingala mo sa asul niyang dagat

Misteryoso mang nagmamaliit, nagpapakumbaba sa'yo

Na nagputol ng pisi sa isang walang kwentang salamat

Sundo

kay tagal kong sinusuyod ang buong mundo

para hanapin ka...

Nilibot ang distrito ng iyong lumbay

pupulutin ka...

asahan mo, mula ngayon pag-ibig ko'y sayo

-IMAGO_SUNDO

mama on the pic. (stolen)

Ngiting Pikit

Sa gabing kumikislap ang pundidong pag-iisip

Tumitilaok na ang sigaw ng panaginip

Lulubog na ang naglalambot na langit

Sa mukhang nakikitang nakatawang may sakit

Sa tinding paglaglag sa mataas na hagdan

Sumibol ang tinik mula sa kawalan

Nagsugat ang mukhang tinatanaw ng langit

Nagdurugo, sumasabay sa pamatay na awit

Pagpikit ng mata’y di makita ang saya

Nawalan ng pula ang dugo sa sinta

Kumintab ang kislap ng ngiti sa paghiga

Nawalang saysay ang dugong, sa langit nagpalamya

Umagos ang luhang, ngiti ang ina

Natamo ang saya sa pagdilim ng mata

Tumahan man ang tawa’y rinig pa rin ang halakhak

Sa pagpikit naalala ang siyang nagpapagalak

Kumabog ang puso sa malambot na dingding

Matigas na unang niyayakap ang ningning

Bawat patak ng ningning sa pikit na pagngiti

Nawawalan ng segundo ang bawat sandali

Nangalay na ang mata sa lubos na paraiso

Sumosobra na sa panaginip na nawaring bisyo

Nagtanghal na ang bida sa kapal ng maskara

Natanggal na ang nawawalang takip ng lampara

Naibahid na ang pagdamdam sa gabing balot sa dilim

Nadapa na ang simangot na naghatid ng lagim

Wala ng natira sa salitang mawawaksi

Panay pa rin ang pagsulat sa damdamin ng budhi

Wala ng magawa ang mukhang nalilito

Nagbigay windang sa langit

Nagbigay ngiti sa’yo

Poem Published in BUGHAW 2008 Edition (The Official Portfolio of the School Publication, The Olfazette) La Consolacion College Tanauan. This is one of the most memorable published poems I made for the Olfazette. This is also the poem that started the Tulang Hugot sa ilalim ng Lupa Series which is over 30 poems already.